الحلقه الاولى
نوره انسانه رقيقه محافظه , عقيدتها صافية , انسانه موحده لاتشرك بربها احد .. صحيح انها تسمع اغاني , تقرأ شعر وروايات ,
ولكنها تصلي الصلوات المفروضه كاملة على وقتها
تقرأ القرآن , تصوم رمضان , خصصت مبلغا يسير من مصروفها القليل صدقة لوجه الله تعالى
هي تعلم ان الله خلقها بشر وليس ملاك , تتصرف كأنسانه لها روح ومشاعر واحساس
غرفتها هي جنتها في الدنيا في كل زاوية من الغرفه لها بصمة , كل ماتحبه من الالوان هنا في ستائرها ومفارش سريرها
ومخداتها , وحتى العرائس التي تعشق شرائها تختارها هي كما تحب
وكمبيوترها هو نافذتها للعالم الخارجي
جالسه هي الان تحدث شقيقتها وتشكرها لانها دفعت قيمة اعادة خدمة الانترنت
نوره : فطومه حبيبة قلبي شكرا ماتتخيلين كثر ايش انا بدون انترنت كيف اكون احس بالعزله وكأن هالعالم مافيه الا انا
فاطمه : ولا يهمك نوارتي تدللين انتي كم نواره عندنا وكل ما احتجتي شي بس قولي لي
نوره : طيب فطوم يالله الحين بعد اذنك بفتح المسنجر اشتقت للبنان وسوالفهم
فاطمه : طيب حبيبتي مع السلامه
فتحت نوره المسنجر ووجدت طلب اضافه من سعود
سعود ! مين هذا .. كيف عرف ايميلي ؟! .. هذا ايميلي الخاص وماعندي غيره اصلا يعني ماحد يعرفه الا اخواني وصديقاتي
امممم مين هذا ؟
اقبل اضيفه والا لا .. لا لا ماراح اقبل اكيد واحد لعاب والا يمكن من اخوان صديقاتي عرفوا ايميلي بالصدفه
خلاص راح ارفض .. طيب يمكن واحد من اخواني وحاب يحطني في اختبار ويشوف انا اكلم احد غريب والا لا !
ايييوه اكيد من اخواني .. خلاص راح اقبل واثبت لهم اني استحق الثقه
قبلت نوره الاضافه, وكان سعود متصل .
السلام عليكم ..
وعليكم السلام
الله عليك اخيرا تكرمتي و اضفتيني مشكوره
العفو .. بس مين انت
انا سعود
سعود ! .. مين سعود ؟
سعود بن ناصر
انا ما اعرفك .. انت تعرفني ؟
نوره شفيك ؟!!
نوره مين ؟
وبعدييين !!
لحظه ..
طيب !
نوره تحدث نفسها :ياربي مين هذا ومن وين يعرفني .. اكيد انه واحد من خواني يستهبل علي
ويمكن مايستهبل كل قصده يختبرني .. وش اقوله ذا الحين
أخ سعود
هههه حلوه أخ هذي !!
انا مضطره اطلع من المسنجر ولو سمحت احذف ايميلي
نوره خلاص يكفي استهبال عندي كلام مهم بقوله لك
لو سمحت احذف ايميلي وعلى فكره ترى قبلت الاضافه بالغلط
طيب افتحي جوالك ليش مقفل ؟!
مو مقفل .. وانا طالعه باي
طيب خليك دقيقه بس
سعود يحدث نفسه : لا يكون انا غلطان بس اشوف وين رسالتها هذي
باي
لحظه ارجوك
شوفي يابنت االناس انا آسف والله فكرتك اختي الحين عرفت اني غلطان
بعد مارجعت لرسالتها على الجوال اللي فيها ايميلها
وطلع نفس ايميلك بس ناقص رقم 3
طيب خلاص ماصار شي باي
نوره لحظه
انا اسمي مو نوره
طيب يا مو نوره ممكن تنتظرين دقايق بس
آسفه ما اقدر ولو سمحت احذف ايميلي
ابشري خلاص احذفه ولا يهمك
شكرا
العفو
مع السلامه
الله معك
نوره تحدث نفسها : مين هذا معقول يكون واحد من خواني !!
معقول .. ليش مو معقول .. اعرفهم الغيره والاعراف والتقاليد وال وس وس هـ ومدري ايش بعد مسيطر على عقولهم
بس هذي مو غيره هذي يسمونها عدم ثقه .. بس ليش مايثقون فيني وش شايفيني يعني
استغفر الله بس .. الله يسامحهم .. يالله ماعلينا لو كان واحد منهم هذا انا نجحت بالاختبار .
ام نوره : تطرق باب غرفة ابنتها .. نوره .. يا نوره
نعم يمه
تعالي يابنتي سوي القهوه لخوانك واجلسي معهم
اخواني هنا
ايه
كلهم ؟!
ايه كلهم الله يحفظهم وش فيك انتي
يعني حمد وفهد وسلطان كلهم هنا
بابنت انتي وش فيك اعوذ بالله من الشيطان استخفيتي !
افتحي الباب
خلاص يمه انا جايه
غريبه يعني فعلا هذا صادق انه غلطان .. يالله .. الله يستر عليه
للحين متصل !
سعود .. حلو اسمه .. يعجبني .. سعود بن ناصر مين هذا ؟!
يا نووووره
هاااه يمه خلاص جيت جيت
اخوان نوره الثلاث حمد وفهد وسلطان جالسين مع امهم بالصاله كلهم متزوجين وعايشين في شقق مستقله عن والدتهم
حمد الكبير وعنده خمسة اطفال ولدين وثلاث بنات ,, وفهد عنده بنت وولد
اما سلطان هو اصغر واحد وعنده ولد واحد حمودي دلوع العائله عمره سنه ونص
والدهم متوفي قبل ست سنوات ونوره اختهم الصغيره تخرجت قبل سنه من الجامعه
ومالقت وظيفه ماتزوجت وتسكن مع والدتهم في بيت العائله
واختهم الكبيره فاطمه متزوجه وتعيش بنفس المدينه
نوره : سلام .. ماشاء الله الحبايب كلهم مجتمعين خير وش الطاريء
سلطان : باين معصبه
نوره : لا مو معصبه بس ليش ماجبت حمودي معك
سلطان: حمودي راح مع امه عند اهلها
نوره: اها قول كذا مو حضرتك مانشوفك الا اذا فضى عليك البيت
حمد : نوره بالله بسرعه القهوه ترى اخوك مصدع ومشتهي القهوه
نوره : ماعندنا بن
فهد : سويها بدون بن
نوره : هههه يادمك!
حمد : من جد والله ترى ماتقهويت اليوم بسرعه قبل الصلاة بنروح نصلي بالمسجد
سلطان : حمد مايصلي بالمسجد الا هنا عشان الامام ابو المدام
فهد :هههه واضح
نوره : احد جايب معه لاب توب هنا
سلطان : هنا ؟
نوره : ايه
سلطان : لا ما اظن حمد فهد معكم لاب توب
فهد : لاب توب !
نوره : خلاص خلاص بس هو سؤال
سلطان : ليش جهازك خربان
نوره : لا لا مو خربان شفيك انت كبرت السالفه
حمد : وين امي ؟!
نوره : يؤ نسيت القهوه الظاهر امي راحت تسويها
حمد : ينادي والدته .. يمه .. يمممه .. مامي .. ماما
سلطان : مامي !هههه
فهد ونوره : هههه
نوره : مامي طالعه زي العسل من فمك يا حمود مامتو هههه
سلطان : مامي ! هههه اقول لايسمعك امام المسجد .. مامي ههه
فهد : من جد امي تسوي القهوه وانتي جالسه هنا .. روحي شوفيها وسوي القهوه عنها
سلطان : قومي يالله وش فايدتك هنا
نوره : عشان كلامك سلطانوه ماراح اقوم .. هه وهذي جلسه
حمد : يمه .. يا يمه وينك ؟ تعالي الله يرضى عليك مانبي قهوه
سلطان : مامي خخخخ ويقول مانبي قهوه ابو النصب هههه
ام حمد : هلا .. نعم يا حمد وش بغيت ؟
حمد : بغيت رضاك يالغاليه .. وين رحتي جايين عشانك الله يحفظك
نوره : جاي علشان القهوه وانت الصادق
سلطان : اقولكم معصبه!
ام حمد : تنادي الشغاله .. سرتين هاتي القهوه والحلا بسرعه
حمد : نوره بالله جيبي القهوه انتي .. وش يدخل ذا الشغاله علينا
سلطان : الاخ مسوي مطوع مايشوف غريبات !
نوره : ايييه .. هين .. كن ماعنده شغالتين في بيته
سلطان : هههه اقولكم والله معصبه البنت !!
فهد : ساكت ويبتسم بس
الشغاله : فين حط قهوه ماما
ام حمد : هنا هنا وانا امك حطيها بالنص ووزعي الحلا
نوره : خلاص روحي سرتين انا اوزع الحلا .. لا ياكلنا حمد الحين
سلطان : كيف حالك سرتين
سرتين حمد لله انا كويس .. بابا سلتان بليز سلم انا على حمودي انا يحبه كتيير
ليش مافي يجيب هنا صباح حمودي
سلطان : خلاص حمودي فيه شغاله جديد الحين خليه ينام صباح في بيت
فهد : والله سلطان صار يعرف يتكلم لغات
سلطان : هههه فلبينو لانق و ج
نوره : ههه وج
فهد : وش اخبار فاطمه ؟ تجيكم ؟..
________________
يتبع في الحلقه الثانيه
________________
تأليف : عاليه العنزي
02-02-2010
شادن .. ( حلقات متسلسله )
النمط الخطي
